Sunday, November 4, 2012

ತಲೆನೋವು ಬಹಿಷ್ಕಾರ ಹಾಕಿದ ಹಾಗೆ ಎಲ್ಲೋ ಹೋಗಿಬಿಟ್ಟಿದೆ

     ಒಂದು ಕಾಯಿಲೆ ಬಂದರೆ ಇದೊಂದು ಬಿಟ್ಟು ಬೇರೆ ಯಾವ ಕಾಯಿಲೆ ಬಂದರು ತಡೆದು ಕೊಳ್ಳ ಬಹುದಿತ್ತು ಎನಿಸುತ್ತದೆ. ಮನುಷ್ಯನ ಮನಸ್ಥಿತಿಯೇ ಅಂತದ್ದು. ಬೇಸಿಗೆ ಕಾಲ ಬಂದರೆ ಮಳೆಗಾಲ, ಮಳೆಗಾಲ ಬಂದರೆ ಚಳಿಗಾಲ ಆಗಿದ್ದರೆ ಚನ್ನಾಗಿರುತ್ತಿತ್ತು  ಅಂದುಕೊಂಡ ಹಾಗೆ. ಇಲ್ಲಿ ನನಗೆ ಕಾಡುತ್ತಿದ್ದುದು ಸುಮಾರು ವರ್ಷದಿಂದ ತಲೆನೋವು. ಇದು ತಲೆ ಮೇಲೆ ನೋವು ಅಥವಾ ಹಣೆ ಮೇಲೆ ನೋವು ಬರುವಂತದ್ದಲ್ಲ. ಮೂಗಿನ ಸಂದು ಮತ್ತು  ಹಣೆ ಸಂದು ಕೂಡುವ ಜಾಗದಲ್ಲಿ. ಏನೋ ಒಂದು ತರಹ ಕಫ ಒಳಗೆ ಇದ್ದಂತೆ ಮುಟ್ಟಿದರೆ ಹುಬ್ಬಿನ ಸಂದು ದಪ್ಪ ಎನಿಸುತ್ತಿತ್ತು. ಇದಕ್ಕೊಂದು ಇತಿ ಮಿತಿ ಅನ್ನೋದಿಲ್ಲ ಬಂದರೆ ಒಂದು ವಾರ ಆದರು ಹೋಗೋದಿಲ್ಲ. ಕೆಲವೊಂದು ಮುಜುಗರ  ಮಾಡೋ ನೆಂಟರು ಮನೆಗೆ ಬಂದು ಒಂದು ವಾರ ಉಳಿದರೆ ಹೇಗಾಗತ್ತೋ  ಹಾಗನಿಸ್ತಿತ್ತು ಈ ತಲೆ ನೋವು. ಕೆಲವೊಂದು ಸಲ ಬೆಳಗ್ಗೆ ಶುರು ವಾದ ತಲೆ ನೋವು ಸಂಜೆ ಕಮ್ಮಿ ಆಗಿ ಮರುದಿನ ಬೆಳಗ್ಗೆ ಮತ್ತೆ ಅದೇ ಸಮಯಕ್ಕೆ ಶುರುವಾಗೋ ತರದ್ದು . ಇದೊಳ್ಳೆ ಕಾಲೇಜ್ ಗೆ ಹೋಗಲೇಬೇಕು ಅಂತ ಕಟ್ಟುಪಾಡು ಹಾಕಿದಾರೆ ಅಂತ ಹೋಗ್ತಿವಲ್ಲ ಆತರ ಯಾರೋ ಕಟ್ಟುಪಾಡು ಹಾಕಿದಾರೆ ಅನ್ನೋ ಹಾಗೆ ಅದೇ ಸಮಯಕ್ಕೆ ಬರೋದು. ಕೆಲವೊಂದು ಸಲ ತಡೆಯಲಾಗದೆ ಕ್ಲಾಸ್ ನಲ್ಲಿ ಮಲಗಿ ಸರಿಯಾಗಿ ಉಟ  ಮಾಡಲ್ಲ ಏನಿಲ್ಲ ಇನ್ನೇನಾಗತ್ತೆ  ಅಂತ ಬೈಸಿಕೊಂಡಿದ್ದು ಇದೆ. ಅನುಭವಿಸೋರ ಕಷ್ಟ ಅವರಿಗೇನು ಗೊತ್ತು ಬೈಯೋದು ಬಿಟ್ಟು.

ಅತ್ತೆಗೆ ಯಾವುದೊ ಕಾರಣಕ್ಕೆ ಡಾಕ್ಟರ್ ಹತ್ತಿರ ಹೋಗೋ ಕೆಲಸ ಇತ್ತು .ಆ ಡಾಕ್ಟರ್ ನಾಡಿ ನೋಡಿನೇ ನಮಗೇನು ಕಾಯಿಲೆ ಇದೆ ಅಂತ ಗುರುತಿಸುವವರು. ಅದು ಅವರು ಬೆಂಗಳೂರಿನಿಂದ ವಾರಕ್ಕೆ ಒಂದು ಸಲ ಮೈಸೂರ್ ಗೆ ಬರೋದು. ಮೊದಲೇ ಅವರಲ್ಲಿ ಫೋನ್ ನಲ್ಲಿ ಮಾತಾಡಿ 9:30 ಕ್ಕೆ ಹೋದರೆ ಒಳಗೆ ಹೋಗಲು ಆಗೋದು 1:30 ಕ್ಕೆ.ಅಷ್ಟು ಉದ್ದದ ಕ್ಯು .ಅದು ಅವರ ಶಾಪ್ ಇದ್ದಿದ್ದು ಯಾವುದೊ ಗಲ್ಲಿಯಲ್ಲಿ. ಒಂದು ಚಿಕ್ಕ ಕೋಣೆ ಯನ್ನು ಬಾಡಿಗೆಗೆ ಪಡೆದು ಮಾಡುತ್ತಿದ್ದುದು.ಹೊರಗೆ ಕಾಯುತ್ತಿದ್ದವರು ಬಿಸಿಲಿನ ತಾಪಕ್ಕೆ ಸುಸ್ತಾಗಿ ಹೋಗಬೇಕಿತ್ತು. ಅವಳ ಜೊತೆ ಸುಮ್ಮನೆ ಹೋಗಿದ್ದೆ ನಾನು.ಕಾದು ಕಾದು ಸುಸ್ತಾಗಿ ತಲೆ ನೋವಿನ ಮಹಾಶಯನು ಅದೇ ಸಮಯಕ್ಕೆ ಬಂದುಬಿಟ್ಟ. ತಲೆ ನೋವಿಗೆ ಡಾಕ್ಟರ್ ಹತ್ತಿರ ತೋರಿಸೋಣ ಅನಿಸಿದ್ದೇ ಅವಾಗ.

1:30 ಕ್ಕೆ ಅಂತು ಇಂತೂ ಒಳಗಡೆ ಹೋಗಿ ಆಯ್ತು. ಅತ್ತೆಗೆ ಬೇಕಾದ ಮಾತ್ರೆಗಳನ್ನೆಲ್ಲ ಕೊಟ್ಟ ಮೇಲೆ ನನ್ನ ನೋಡಿ ಏನಮ್ಮ ಇಷ್ಟೊಂದ್ ದಪ್ಪ ಇದ್ದೀಯ ಅಂದ್ರು.ಅದಕ್ಕೆ ಸಣ್ಣ ಆಗಲು ಏನಾದರು ಮಾತ್ರೆ ಇದ್ದರೆ ಕೊಡುತ್ತಿರೆನೋ ಅಂತ ಬಂದೆ ಅಂದೆ. ನಕ್ಕು ನೀನು ಮುಂದಿನ ಸಲ ಬರೋದ್ರೊಳಗೆ ಈ ಬಾಗಿಲಿನ ಅರ್ಧದಷ್ಟು ಆಗಿರ್ತಿಯ ಅಂತ ಎದುರಿಗಿನ ಬಾಗಿಲು ತೋರ್ಸಿ. ಯಾವುದೋ ಚೂರ್ಣ ಕೊಟ್ರು ಒಂದು ತಿಂಗಳು ತಗೋ ಅಂತ . ಆ ಚೂರ್ಣ ನೋ ತಿಂದಷ್ಟು ತಿನ್ನಬೇಕು ಎನಿಸುವಂತದ್ದು. ಉತ್ತುತ್ತೆ, ತುಪ್ಪ, ಸಕ್ಕರೆ ಎಲ್ಲ ಹಾಕಿ ಮಾಡಿದ್ದು .ಒಂದೇ ತಿಂಗಳಲ್ಲಿ 2 ಬಾಟಲಿ ಕಾಲಿ  ಮಾಡಿದ್ದೆ.(ಆದರು ವ್ಯತ್ಯಾಸವೇನಿಲ್ಲ). ಹಾಗೆ  ನಾಡಿ ಪರೀಕ್ಷೆ ಮಾಡಿ ತಲೆನೋವು ಏನಾದ್ರು ಇದ್ಯ ಅಂದ್ರು . ಹೌದು ಎಂದೆ. ಅದಕ್ಕೆ ಕೊಟ್ಟ ಔಷಧಿ ತುಂಬಾ ಪರಿಣಾಮಕಾರಿ ಆಯ್ತು . ಎರಡು ತಿಂಗಳು ತಗೊಂಡೆ ತಲೆನೋವು ಊರೊಳಗೆ ಬರೋ ಹಾಗಿಲ್ಲ ಅಂತ ಬಹಿಷ್ಕಾರ ಹಾಕಿದ ಹಾಗೆ ಎಲ್ಲೋ ಹೋಗಿಬಿಟ್ಟಿದೆ. ನಿಮಗೂ ಈ ತರಹದ ತಲೆನೋವಿದ್ದರೆ ಮಾಡಿ ನೋಡಿ.
1.ಸಾಂಬಾರ್ ಈರುಳ್ಳಿ ಅಂತ ಸಣ್ಣದು ಸಿಗುತ್ತಲ ಅದನ್ನು ಬೆಳಗ್ಗೆ ಮತ್ತು ರಾತ್ರೆ ತಲಾ ಒಂದರಂತೆ 2 ತಿಂಗಳ ಕಾಲ ತಿನ್ನಬೇಕು.

2.  25ml ಎಣ್ಣೆ
     1 ಕಾಳು ಸಾಸಿವೆ 
     1 ಕಾಳು ಮೆಂತ್ಯೆ 
     1 ಕಾಳು ಜೀರಿಗೆ 
     1 ಕಾಳು ಕಾಳುಮೆಣಸು 
     1 ಕಾಳು ಕೊತ್ತಂಬರಿ
ಎಣ್ಣೆಗೆ ಸಾಸಿವೆ, ಮೆಂತ್ಯೆ, ಜೀರಿಗೆ, ಕೊತ್ತಂಬರಿ ಮತ್ತು ಕಾಳು ಮೆಣಸು ಹಾಕಿ ಕುದಿಸಿ ತಣಿಸಬೇಕು.ಅಷ್ಟು ತಣಿದ ನಂತರ ಮತ್ತೆ ಕುದಿಸಬೇಕು. ಹೀಗೆ 6 ಸಲ ಮಾಡಿ ಡಬ್ಬ ದಲ್ಲಿ ಹಾಕಿಟ್ಟು ಕೊಂಡು ಬೆಳಗ್ಗೆ ಮತ್ತು ರಾತ್ರೆ ಮೂಗಿಗೆ ಒಂದು ಡ್ರಾಪ್ ಎರಡು ತಿಂಗಳ ಕಾಲ ಬಿಟ್ಟು ಕೊಂಡರೆ ತಲೆ ನೋವು ಬರೋದಿಲ್ಲ. ಮಧ್ಯ ಬಂತು ಎಂದರು ಈ ಎಣ್ಣೆಯನ್ನು ಮಾಡಿ ಬಿಟ್ಟರೆ ಮರುದಿನವೇ ವಾಸಿ ಆಗುತ್ತೆ.

Monday, October 15, 2012

ನಕ್ಕು ಬಿಡು..!



1...ಹಾಲು ಮಾರೋ ಚೆನ್ನಿ  :  ನಮ್ ಎಮ್ಮೆ ೧ ಸೇರ್ ಹಾಲ್ ಕೊಡ್ತೈತೆ. ಅದ್ರಲ್ಲಿ ಅಚೆಮನೆ ಹೆಗ್ಡೆರಿಗ್ ಅರ್ದ ಸೇರ್ ಕೊಟ್ಟಿನೆ. ನಮ್ ಮಗ್ಳಿಗ್ ಬೇಕು ಅಂತ ಅರ್ದ ಸೇರ್ ಇಟ್ಕಂಡಿನಿ..
ಮತ್ತೆ ಅಚಿಮನಿ ಮಗಿಗ್ ಹುಷಾರಿಲ್ಲ ಅಂತ ಅರ್ದ ಸೇರ್ ಇಗಷ್ಟೇ ಕೊಟ್ಬಂದ್ನಿ...
ಇವಾಗ್ ನಿಮ್ಗೆಷ್ಟು ಹಾಲ್ ಬೇಕು ಹೇಳ್ರಿ ...


2...ಚೆನ್ನಿ ಅಡಿಕೆ ಸುಲಿಯೋಳು ಪಕ್ಕದಲ್ಲಿ ಕುತ್ತಿದ್ ಹೆಗ್ಗಡತಿ ಹತ್ರ ನಮ್ಮ ಮನೆಲು ನಿಮ್ಮ ಮನೆಲೆಲ್ಲ ಮಾಡೋ ಹಾಂಗೆ ಭಾರತ್ ವಡೆ ಮಾಡ್ತಾರೆ ಅಂದ್ಲು...
 ಹೆಗ್ಗಡತಿಗೆ ಆಶ್ಚರ್ಯ ಏನಿದು ಭಾರತ್ ವಡೆ ಅಂದ್ರೆ ನಮ್ಮನೆಲೆಲ್ಲ ಮಾಡ್ತಾರೆ ಅಂತಿದಾಳಲ್ಲ ಏನಾದ್ರೂ ಸ್ವೀಟ್ ಇರಬೋದಾ ಅಂತ ತಲೆಕೆಡ್ಸ್ಕಂಡು ಸಾಕಾಗಿ ಕೇಳೇಬಿಟ್ಲು ಹಂಗಂದ್ರೆ ಏನೇ ಚೆನ್ನಿ ಅಂತ..
ಅದೇ ಹುಟ್ಟಿದ್ ದಿನ ಅದೇನೋ ದೀಪ ಹಚ್ಚಿ ಮಾಡದಿಲ್ಲ ಅದೇಯ ಅಂದಾಗ ಹೆಗ್ಗಡತಿಗೆ ಬರ್ತ್ ಡೇ ಅಂತ ಗೊತ್ತಾಗಿ ಬೇಸ್ತು..

Saturday, July 21, 2012

ನಗೋಕೆ ಶುರು ಕಳೆದುಹೋದ ಹುಡುಗಿ!!!

            ತಮ್ಮನ ಉಪನಯನದ ಸಮಯ.ಸ್ವಲ್ಪ ಬೇಗನೆ  ಮಾಡಿದ್ದರು  ಅಜ್ಜನ ಹಟಕ್ಕೆ .ತಾನು ಸಾಯುವುದರೊಳಗೆ ಮೊಮ್ಮಗನ ಉಪನಯನ ನೋಡುವಾಸೆ ಅವರಿಗೆ  ಅಥವಾ  ಕೊನೆಗೆ ಅಪ್ಪನೊಬ್ಬನಿಗೆ ಮಾಡಲು ಕಷ್ಟವಾಗುತ್ತದೆ ಎನ್ನೋದು ತಲೆಯಲ್ಲಿ ಇದ್ದಿರಬಹುದು.
              ಅಂತೂ ಉಪನಯನ ನಿಶ್ಚಯವಾಗಿ ಎಲ್ಲರನ್ನು ಕರೆಯೋದು ಶುರುವಾಗಿತ್ತು..ಅವಾಗ ಸ್ಕೂಟರ್ ಇತ್ತು  ನಮ್ಮಮನೆಯಲ್ಲಿ .ಒಂದು ದಿನ ಕರೆಯಲು ಹರಿಗೆ ಗೋ ಹಲಗೇರಿ ಗೋ ಹೋಗಿದ್ದಾರೆ ಅಪ್ಪ ಅಮ್ಮ ..ಅಲ್ಲಿಯ ರಸ್ತೆ ಗಳೇ ಹಾಗೆ ಕಲ್ಲು ಮಣ್ಣಿನ ರಸ್ತೆ .ರಾತ್ರಿ 8 ಆದ ನಂತರ ಒಬ್ಬರು ರಸ್ತೆಯಮೇಲೆ ಕಾಣೋದಿಲ್ಲ .ಅಕ್ಕ ಪಕ್ಕದಲ್ಲಿ ಕಾಡುಗಳು ಮದ್ಯ ಹೆಬ್ಬಾವು ಹೊಟ್ಟೆ ತುಂಬಾ ತಿಂದು ಮಲಗಿದಂತೆ ಕಾಣುವ ರಸ್ತೆ .ಈ ಸಮಯದಲ್ಲಿ   ಅಜ್ಜನ ಮನೆಯಲ್ಲಿ ಕರೆದು 8 ರ ಸಮಯದಲ್ಲಿ ಹೊರಟಿದ್ದಾರೆ. ನಮ್ಮ ಸ್ಕೂಟರಿನ ಲೈಟ್ ಕೈ ಕೊಟ್ಟು ಬಿಡ್ತು ಅಷ್ಟೊತ್ತಿಗೆ.ಮನೆಗೆ ಹೇಳಲು ಮೊಬೈಲ್ ಇರಲಿಲ್ಲ  .ಕೊನೆಗೆ ಹೇಗೋ ಅಪ್ಪನ ಸಿಲುಕಿನಲ್ಲಿ ಇರುವ ಸಲಕರಣೆಯಿಂದ  ಸ್ವಲ್ಪ ಸರಿ ಮಾಡಿಕೊಂಡು ಹೇಗೋ  ಮನೆ ಮುಟ್ಟಿದರು.
              ಮರುದಿನ ಅಪ್ಪನೊಂದಿಗೆ ನಾನು ಹೊರಟಿದ್ದೆ .ಅಪ್ಪನ ಕಡೆ ನೆಂಟರ ಮನೆಯಾಗಿತ್ತು ಅದು.ಅಮ್ಮ ಎಲ್ಲಿಗೋ ಹೋಗಿದ್ದರು ಅನಿಸುತ್ತೆ .ಅಪ್ಪ ಮಗಳು ಇಬ್ಬರೇ ಇದ್ದರು.ನಮ್ಮಕಡೆಯ ಪದ್ದತಿಯೇ ಹಾಗೇ  ಬಂದವರಿಗೆ ಕುಡಿಯಲು ಏನಾದರು ಕೋಡಲೇಬೇಕು ಕೊನೆಗೆ ಸಕ್ಕರೆನಾದರು.ಅದಾಗಲೇ 4 ಮನೆಯಲ್ಲಿ ಕುಡಿದು ಸಾಕಾಗಿತ್ತು .ನಾವು ಏನು ಬೇಡ ಎಂದರೂ ಕೇಳದೇ ಮಗಳೇ ಸ್ವಲ್ಪಾ ಹಾಲು ಬೆರೆಸು ಎಂದಾಗಿತ್ತು ಆ ಪುಣ್ಯಾತ್ಮ .ಅವಳು 2 ಲೋಟದಲ್ಲಿ ಅರ್ಧ ತಂದಿಟ್ಟಳು .ಹಾಳಾದ್ದು ನನ್ನ ಲೋಟದಲ್ಲೇ ಇರಬೇಕೆ ಆ ಇರುವೆ.ಮನೆಯಲ್ಲಿ ಒಂದು ಚಿಕ್ಕದೇನಾದರೂ ಇದ್ದರು ಗಲಾಟೆ ಮಾಡೋಳಿಗೆ ಇವತ್ತು ಕಣ್ಣು ಮುಚಿಕೊಂಡು ಕುಡಿದಿದ್ದಾಯಿತು ಆ ಇರುವೆಯನ್ನು ಕಷ್ಟಪಟ್ಟು ಲೋಟದ ಅಡಿಯಲ್ಲೇ ಬಿಟ್ಟು .
               ಮೊದಲೆಲ್ಲಾ ಕಾರ್ಯಕ್ರಮ  ಇದೆ ಎಂದರೆ 4 ದಿನ ಮೊದಲೇ ನೆಂಟರು ಬಂದು ಸೇರುತ್ತಿದ್ದರು.ಭತ್ತ ಕುಟ್ಟೋದರಿಂದ ಹಿಡಿದು ಊಟ ಆದ  ಮೇಲೆ ಬಾಳೆಲೆ ತೆಗೆದು  ನೆಲ ಸಾರಿಸುವುದರ ವರೆಗೂ ಊರ ಜನ ಮತ್ತೆ ನೆಂಟರೇ ಮಾಡುತ್ತಿದ್ದರು. ಹೀಗೆ 4 ದಿನ ಮೊದಲು ಬಂದವರಲ್ಲಿ ಅಜ್ಜನ ತಮ್ಮನ ಮೊಮ್ಮಗಳು ಗೀಜಗಾರಿನಿಂದ ಬಂದಿದ್ದಳು ಅವಳಮ್ಮನ ಜೊತೆ..ಸುಮಾರು ನನಗಿಂತ 1 ವರ್ಷ ದೊಡ್ಡವಳಾಗಿದ್ದರಿಂದ ಆಟ ಆಡಲು ಚನ್ನಾಗಾಗಿತ್ತು.ಉಪನಯನ ಮುಗಿದು ಮರುದಿನ ಆಗಿದೆ ಮದ್ಯಾಹ್ನದ ಸಮಯ ಆ ಹುಡುಗಿ ಕಾಣಿಸುತ್ತಿಲ್ಲ .ಎಲ್ಲ ನನ್ನೊಂದಿಗೆ ಇದಾಳೆ ಅಂದುಕೊಂಡಿದ್ರು.ಅವಳು ನನ್ನ ಜೊತೆಯೂ ಇಲ್ಲ .ಎಲ್ಲರಿಗೂ ಭಯ ಶುರುವಾಗಿದ್ದು ಅವಾಗಾ.ನಮ್ಮ ಉರಿನಲ್ಲಿ ಕೆರೆ ಬೇರೆ ಇದೆ ಆಟ ಆಡಲು ಹೋಗಿ ಅಲ್ಲೆಲ್ಲಾದರೂ ಬಿದ್ಲ  ಅನ್ನೋದೇ ಎಲ್ಲರ ತಲೆಯಲ್ಲೂ .ಇಡೀ ಊರನ್ನು 10 ಸಲ ಸುತ್ತಿದ್ದಾಯ್ತು .ಎಲ್ಲೂ ಪತ್ತೆ ಇಲ್ಲ ಆಸಾಮಿ.ಮನೆಯ ಎದುರಿಗೆ ತೋಟ. ಮೆಟ್ಟಿಲ ಪಕ್ಕದಲ್ಲೇ ಬಾವಿಬೇರೆ. ಅದನ್ನು ಇಣುಕಿ ನೋಡಿದ್ದಾಯ್ತು .ಅವಳ  ಅಮ್ಮನ ರೋದನೆಯನ್ನು ನೋಡಲಾಗುತ್ತಿರಲಿಲ್ಲ ಪಾಪ. ಕೆಲವರು ಹೇಳಿದ್ರು ಇದು ಚೌಡಿದೇ ಕಾಟ ಅಂತ .ಅದಕ್ಕೆ ಸಿಟ್ಟು ಬಂದರೆ ಎಲ್ಲಾದರು ಅಡಗಿಸಿ ಇಟ್ಟು ಬಿಡುತ್ತಂತೆ.ನನ್ನ ಅಜ್ಜನ ತಂಗಿಯನ್ನು ಹೀಗೆ ಒಂದುಸಲ ಮೇಲ್ಮೆತ್ತಿ ಯ ಮೇಲೆ ಅಡಗಿಸಿ ಬಿಟ್ಟಿತ್ತು ಎಷ್ಟು ಹುಡುಕಿದರೂ ಸಿಗದೇ ಕೊನೆಗೆ ಮೇಲ್ಮೆತ್ತಿ ನೋಡಿದಾಗ ಮೂಲೆಯಲ್ಲಿ ಸುಮ್ಮನೆ ಕೂತಿದ್ರು ಅಂತ ಅಜ್ಜ ಹೇಳಿದ ನೆನಪು .ಮನೆಯನ್ನೂ ಹುಡುಕಿದ್ದಾಯ್ತು. ಇಷ್ಟಾದರೂ ಜಗುಲಿಯಲ್ಲಿ ಅಜ್ಜಂದಿರು ತಮ್ಮ ಪಾಡಿಗೆ ಹರಟೆ ಹೊಡೆಯುತ್ತಾ ಕೂತಿದಾರೆ.ಅವರಿಗೆ ಇಷ್ಟೆಲ್ಲಾ  ಆಗಿದ್ದರ ಅರಿವೇ ಇಲ್ಲ .ಕೊನೆಗೆ ಅಜ್ಜನಲ್ಲಿ ಹೋಗಿ ಕೇಳಿದೆ .ಅವರಿಗೆ ಕಿವಿ ಕೇಳುತ್ತಿರಲಿಲ್ಲ .ಸ್ವಲ್ಪ ಜೋರಾಗಿ ಅಜ್ಜಾ ಸುಮ ಕಾಣ್ತಿಲ್ಲೆ ನಿಂಗೆಂತಾರು ಗೊತ್ತಿದ್ದನ ಅಂತ ಕೇಳಿದ್ರೆ ಅಜ್ಜ ಹೇಳಿದ್ದು ನನ್ನ ಕ್ವಾಣೆಲಿ ಮಲಗಿದ್ದ .ಅಜಾ ನಿದ್ದೆ ಬತ್ತಿದ್ದು  ಒಳಗೆಲ್ಲೂ ಜಾಗಿಲ್ಲೇ ಹೇಳಿ ಬಂದ  ನಾನೇ  ನನ್ ಕ್ವಾಣೆಲಿ ಮಲ್ಸಿಕ್ಕ್ ಬೈಂದಿ .ಇವಾಗಷ್ಟೇ ಹೋಗಿ ನೋಡಿರೆ ಚಳಿ ಲಿ ನಡುಗ್ತಿತ್ತು ಒಂದು ಬೆಡ್ ಶೀಟ್ ನು ಹೊದ್ಸಿಕ್ ಬೈಂದಿ ಅಂದ್ರು .ಜಗುಲಿಯಲ್ಲೇ ಅಜ್ಜನ ಕೋಣೆ ಇದ್ದಿದ್ರಿಂದ ಆ ಕೋಣೆಯನ್ನು ಹುಡುಕಿರಲಿಲ್ಲ . ಅವಳ ಅಮ್ಮ ತಕ್ಷಣ ಓಡಿ ಹೋಗಿ ಮಗಳನ್ನ ಮುದ್ದಿಸಿ ಅಳ್ತಿದ್ರೆ ಆ ಹುಡುಗಿಗೆ ಏನಾಗ್ತಿದೆ ಅಂತಾನೆ ತಿಳಿಯುತ್ತಿಲ್ಲ. ನಿದ್ದೆ  ಬೇರೆ .ಕೊನೆಗೆ ನಡೆದಿದ್ದೆಲ್ಲ ಹೇಳಿದ್ಮೇಲೆ ಬಿದ್ದು ಬಿದ್ದು ನಗೋಕೆ ಶುರು ಆ ಹುಡುಗಿ.

Friday, March 30, 2012

ಬೇಸಿಗೆಯಲ್ಲಿ ಕೂಲ್ ಕೂಲ್

 ಸಾಮಾಗ್ರಿಗಳು -
ಹಾಲು -೧ ಲೋಟ 
ಕಸ್ಟರ್ಡ್ ಪೌಡರ್ (ವೆನಿಲ್ಲಾ)-೪ ಚಮಚ
ಎಸೆನ್ಸೆ (ವೆನಿಲ್ಲಾ )-೨ ಚಮಚ
ಸಕ್ಕರೆ-೭ಚಮಚ 
ಉಪ್ಪು -೧ ಚಿಟಿಕೆ
ವಿಪ್ಡ್ ಕ್ರೀಂ - [ಹಾಲು (೧ ಲೋಟ ) -ಮೈದಾ ಹಿಟ್ಟು (೧ ಚಮಚ )-ಸಕ್ಕರೆ (೨ ಚಮಚ )-ವೆನಿಲ್ಲಾ ಎಸೆನ್ಸೆ  (೧/೨ಚಮಚ)- ಉಪ್ಪು (೧ ಚಿಟಿಕೆ)
                   -  ಮೈದಾ ಹಿಟ್ಟು ,ಸಕ್ಕರೆ, ಉಪ್ಪನ್ನು ತಣ್ಣನೆಯ ೧/೨ ಕಪ್ ಹಾಲಿಗೆ ಹಾಕಿ ಕರಡಿಕೊಳ್ಳಿ
                   - ಉಳಿದ ೧/೨ ಕಪ್ ಹಾಲನ್ನು ಬಿಸಿ ಮಾಡಿ ಕರಡಿದ ಮಿಶ್ರಣವನ್ನು ಬಿಸಿ ಹಾಲಿಗೆ ಹಾಕಿ ದಪ್ಪ ಆಗುವರೆಗೆ           
ತೊಳೆಸಿ .   ನಂತರ ತಣಿಯಲು ಬಿಡಿ .ತಣಿದ ನಂತರ ವೆನಿಲ್ಲಾ ಎಸೆನ್ಸೆ ಹಾಕಿ  ]
                                                        

 ಮಾಡೋ ವಿಧಾನ -
-೧/೨ ಕಪ್ ಹಾಲನ್ನು   ಬಿಸಿ ಮಾಡಿ,ಸಣ್ಣ ಬೆಂಕಿ ಮಾಡಿ
-ಕಸ್ಟರ್ಡ್ ಪೌಡರ್ ಅನ್ನು ೧/೨ ಕಪ್ ತಣ್ಣನೆಯ ಹಾಲಿನೊಂದಿಗೆ ಕರಡಿಕೊಂಡು  ಬಿಸಿಯಾದ ಮಿಶ್ರಣಕ್ಕೆ ಹಾಕಿ ಗಟ್ಟಿಯಾಗುವವರೆಗೆ ಕರಡಿ ತಣಿಯಲು ಬಿಡಿ 
 - ವಿಪ್ಡ್ ಕ್ರೀಂ,ಉಪ್ಪು,ಸಕ್ಕರೆ ,ಎಸೆನ್ಸೆ ಅನ್ನು  ಮೇಲಿನ ಮಿಶ್ರಣಕ್ಕೆ ಹಾಕಿ.
-ಮಿಕ್ಸಿ ಗೆ ಹಾಕಿ 10 ನಿಮಿಷದ  ತನಕ ರುಬ್ಬಿ



-ನಂತರ ಗೋಡಂಬಿ ,ದ್ರಾಕ್ಷಿ ಯನ್ನು ಮಿಕ್ಸ್  ಮಾಡಿ ಅಗಲವಾದ ಪಾತ್ರೆಗೆ ಹಾಕಿ ಫ್ರಿಜರ್ ನಲ್ಲಿ ೭ ಗಂಟೆ  ಕಾಲ ಇಟ್ಟರೆ ಐಸ್ ಕ್ರೀಮ್ ರೆಡಿ

Thursday, March 22, 2012

ಮಂಗ..

ಮೈಸೂರ್ ಗೆ ಬಂದ ಹೊಸತು. ಮಂಗಗಳೆಂದರೆ ನಮ್ಮ ಉರಿನಲ್ಲಿ ಹಿಡಿ ಹಿಡಿ ಅಂದ ತಕ್ಷಣ ಓಡಿಹೋಗೋದನ್ನ ನೋಡಿದ್ದೆ . ಅದರ ಕಿತಾಪತಿ ತಾಳಲಾರದೆ ಹಿಡಿಸಿ ದೂರದ ಕಾಡಿಗೆ ಬಿಟ್ಟು ಬರ್ತಿದ್ರು.ಆದರು  ಒಂದ್ ೧೫ ದಿನಕ್ಕೆಲ್ಲ ಮತ್ತೆ ಅಷ್ಟೇ ಮಂಗಗಳು ಹಾಜರಿ ಹಾಕ್ತಿದ್ವು.ಕೆಲವೊಂದು ಸಲ ಸಿಗದೇ ಮರದ ಮೂಲೆಯಲ್ಲಿ ಅಡಗಿ ಕುಳಿತಿದ್ರೆ ಬಂದೂಕಿನಿಂದ ಹೊಡಿತಿದ್ರು.ಆಗ ಅದು ಕೈ ಮುಗಿದುಕೊಂಡು ಕೆಳಕ್ಕೆ ಬೀಳೋದನ್ನ ನೋಡಿದ್ರೆ ಪಾಪ ಅನಿಸೋದು.(ಯಾಕೆ ಸಾಯೋವಾಗ ಕೈ ಮುಗಿಯುತ್ತೆ ಅನ್ನೋದು ಇನ್ನು ಗೊತ್ತಿಲ್ಲ).. 
ಈ ಮೈಸೂರ್ ನಲ್ಲಿ ಬಂದ  ೪ ದಿನಕ್ಕೆ ಮಂಗದ ಪರಿಚಯವಾಗಿತ್ತು . ಕೆಳಗಡೆ ಅಕ್ಕನ ಮನೆಗೆ ದಿನಾ ಹೋಗ್ತಿದ್ದೆ..ಹಾಗೆ ಅವತ್ತು ಹೋದಾಗ ಅಕ್ಕ ಅಡುಗೆ ಮನೆಯಲ್ಲಿ ಯರತ್ರಾನೋ ಚಿಕ್ಕ ಮಕ್ಕಳನ್ನು ಮಾತನಾಡಿಸುವ ಹಾಗೆ ಮಾತನಾಡ್ತಿದ್ರು.. ಸುಮ್ಮನೆ ಹೊರಗಡೆ ಕುಳಿತಿದ್ದೆ. ಅವರ ಗಂಡ ಬಂದೋರೆ ಅಕ್ಕ ಯಾರತ್ರ ಮಾತಾಡ್ತಿದಾಳೆ ಕೇಳಿದ್ರು .ಏನೋ ಗೊತ್ತಿಲ್ಲ ಎದರು ಮನೆ ಆಂಟಿ ಹತ್ರ ಇರ್ಬೋದು ಅಂದೆ.ಒಳಗ್ ಹೋಗಿ ನೋಡ್ಕೋ ಬಾ ಅಂದ್ರು . ಹೋಗ್ ನೋಡ್ತೀನಿ ಒಂದು ಕೈಲಿ ತೊಗರಿ  ಬೇಳೆ ಹಿಡ್ಕೊಂಡಿದಾರೆ .ಎದುರು ಗಡೆ ಕಿಟಕಿ ಇಂದ ಮಂಗ ಇವರ ಕೈ ಹಿಡ್ಕೊಂಡು ಆ ತೊಗರಿ ಬೀಳೆ ತಿಂತಾ ಇತ್ತು .. ಯಪ್ಪೋ !!


ಅಲ್ಲಿಂದ ಸೀದಾ ಮನೆಗೆ ಓಡಿ ಬಂದೆ. ಮುಷ್ಟಿ ತುಂಬಾ ಹೆಸರು ಬೇಳೆ ತಗೊಂಡು  ಕಿಟಕಿ ಹತ್ರ ನಿತ್ಕೊಂಡು ಕಾಯ್ತಿದ್ದೆ .ಬರ್ಲಿಲ್ಲ .ಮರ್ದಿನ ಕಿಟಕಿ ಕೆಳಗಡೆ ಎಲ್ಲ ಸ್ವಲ್ಪ ಹರಡಿ ಕಿಟಕಿ ಇಂದ ನೋಡ್ತಾ ಇದ್ದೆ ಒಂದು ಮರಿ ಮಂಗ ಬಂತು .ಕೈ ಚಾಚಿದೆ . ನಾನು ಕೈ ತೆಗೆದು ಕೊಳ್ಳಬಾರದೆಂದು ಚಂದ ಮಾಡಿ ನನ್ನ ಕೈ ಅನ್ನು ಒಂದು ಕೈಲಿ ಹಿಡ್ಕೊಂಡು ಮತ್ತೊಂದು ಕೈ ಲಿ ಆ ಬೇಳೆ ತೆಗೆದು ಕೊಂಡು ತಿನ್ನೋಕೆ ಸ್ಟಾರ್ಟ್ ಮಾಡ್ತು . ಹೀಗೆ ಅಬ್ಯಾಸ ವಾಗಿ ಬಿಟ್ಟಿತ್ತು ದಿನಾ ೧೧ ಗಂಟೆಗೆ ಬಂದ್ಬಿಡೋದು ಕಿಟಕಿ ಹತ್ರ.ಬಟ್ಟೆ ನೆತಾಕೋ ಹಗ್ಗದ ಮೇಲೆ ಸುಮಾರು ಸರ್ಕಸ್ ಮಾಡಿ ನಗಿಸ್ತಿತ್ತು .



ಒಂದು ದಿನ ಇಸ್ಟೊಂದು ಕ್ಲೋಸ್ ಆಗಿದೆ ಹತ್ತಿರ ಹೋಗಿ ಮುಟ್ಟೋಣ ಅಂತ ಹೋದರೆ ಅದರ ಅಮ್ಮ ಬಂದು ಹೆದರಿಸಿ ಕೈಯಲ್ಲಿದ್ದ  ಬೇಳೆ ಯನ್ನೆಲ್ಲ ಅಲ್ಲೇ ಬಿಟ್ಟು ಓಡುವ ಹಾಗೆ ಮಾಡಿತ್ತು.
 ಕೈಯಲ್ಲಿ ಕೋಲು ಇಲ್ಲದಿದ್ದರೆ ಹೊರಗಡೆ ಹೋಗೋಕೆ ಆಗೋಲ್ಲ ಅಷ್ಟು ಹೆದರಿಸುತ್ತೆ ಸಿಟಿ ಮಂಗಗಳು.ಪಾಪ ಅವಾದ್ರು ಏನ್ ಮಾಡತ್ತೆ ತಿನ್ನೋಕೆ ಹಣ್ಣಿನ ಮರಗಳಿಲ್ಲ ,ವಾಸಿಸೋಕೆ ಕಾಡುಗಳಿಲ್ಲ.ಈ ಸಿಟಿ ನಲ್ಲಿ ಏನು ಸಿಗಲ್ಲ ಹಾಗಾಗಿ ಹೆದರಿಸುವ ತಂತ್ರ ಮಾಡಿರ್ಬೋದು. ಮನೆಯ ಬಾಗಿಲು ತೆಗೆದು ಒಳಗಡೆ ಏನಾದ್ರೂ ಮಾಡ್ತಿದ್ರೆ ಒಳ್ಳೆ ನೆಂಟರು ಬಂದ ಹಾಗೆ ಬಂದು ಅಲ್ಲಿದ್ದ ಪಪ್ಪಾಯ, ಬಾಳೆ ಹಣ್ಣು ಅಷ್ಟು ಕಾಲಿ ಆಗೋವರೆಗೆ ತನ್ನದೇ ಮನೆ ಅನ್ನೋ ತರಾ ಕುಳಿತು ತಿಂದು ಹೋಗುತ್ತೆ .ಅಲ್ಲಿಯ ವರೆಗೆ ನಾವು ಹೊರ ಬರಲು ಹೆದರಬೇಕು...





ಯಾಕೋ ಗೊತ್ತಿಲ್ಲ ಆ ಮರಿ ಮಂಗ ತುಂಬಾನೇ ಇಷ್ಟ ಆಗಿತ್ತು. ದಿನಾ ಅದರ ಹೊಟ್ಟೆ ಸೇವೆ ನಡಿತಿತ್ತು .ಅದು ಬಿಟ್ಟಿ ಮನರಂಜನೆ ಕೊಟ್ಟು ಹೋಗ್ತಿತ್ತು.. ಅದನ್ನ ಹಿಡಿದು ಮನೆಯಲ್ಲೇ ಸಾಕೋಣ ಅಂದ್ಕೊಂಡೆ..ಮರುದಿನ ಒಂದು ಗೋಣಿಚೀಲ ಮತ್ತೆ ಹಗ್ಗ  ರೆಡಿ ಮಾಡ್ಕೊಂಡು ಇಟ್ಕೊಂಡಿದ್ದೆ .ಹಿಡಿಯೋ ತಾಕತ್ತು ನನಗಿಲ್ಲ ಅನ್ನೋದು ತಿಳಿದಿತ್ತು ಅದ್ರು ಟ್ರೈ ಮಾಡೋಕೆನಂತೆ.ಅವತ್ತು ೧೧ ಗಂಟೆಗೆ ರೆಡಿ ಆಗಿ ನೋಡ್ತಿದ್ದೆ ಬಂದೆ ಇಲ್ಲ ಅಸ್ಸಾಮಿ.ಹೀಗೆ ೩,೪ ದಿನ ಅಯ್ತು ಆದರು ನಾಪತ್ತೆ ..ದೀಪಾವಳಿ ಟೈಮ್ ಬೇರೆ. ಸ್ವಲ್ಪ ದಿನ ಆದ್ಮೇಲೆ ಪಕ್ಕದಲ್ಲಿದ್ದ ತೆಂಗಿನ ಮರದ ಮೇಲೆ ಒಂದು ಮಂಗ ಸುಮ್ಮನೆ ಕೂತಿದೆ.ಮುಖ ಮೂತಿ ಬಾಲ ಎಲ್ಲ ಸುಟ್ಟು ಹೋಗಿತ್ತು ಅದು ಹೇಗೆ ಜೀವ ಹಿಡ್ಕೊಂಡ್ ಬಂದು ಇಲ್ಲಿ ಕುತಿತ್ತೋ ಏನೋ  ..ಪಾಪ ಅಂತ ಹತ್ತಿರ ಹೋಗಿ ನೋಡಿದ್ರೆ ಇದೆ ಕಿಲಾಡಿ ಮಂಗ . ಫುಲ್ ಸ್ಮೆಲ್ ಬೇರೆ ಬರ್ತಿತ್ತು.ಅಲ್ಲೇ ನೆಲದ ಮೇಲೆ  ಬೇಳೆ ಹಾಕಿ ಬಂದೆ. ಸ್ವಲ್ಪ ಹೊತ್ತು ಬಿಟ್ಟು ಹೋಗಿ ನೋಡಿದ್ರೆ ಆ ಕಾಳು ಅಲ್ಲೇ ಇತ್ತು ಆ ಮರಿ ಮಂಗನು ಕೊನೆಗೆ ಬರಲೇ ಇಲ್ಲ .

Sunday, March 4, 2012

ಮೋಸ.

ಮಧ್ಯಾಹ್ನ ಊಟ ಮಾಡಿ ಇನ್ನೇನು ಹಾಸಿಗೆ ಕೊಡವಬೇಕೆನ್ನುವಷ್ಟರಲ್ಲಿ ಗೆಳತಿಯ ಫೋನ್ ಬಂತು..೪ ನೇ ಬ್ಲಾಕ್ ಗೆ ಹೋಗಿ ಬರೋಣ ಬಾ.ನನ್ನ ಕೊಲೀಗ್ ಗೆ ಬಸ್ ಪಾಸ್ ಮಾಡಿಸ್ಬೇಕಂತೆ ಅಂದ್ಲು .(( ಆ ಕೊಲೀಗ್ ನಾರ್ಥಿ. ಲಾಸ್ಟ್ ವೀಕ್ ಬಸ್ ಪಾಸು ಮಾಡಿಸುವಲ್ಲಿ ಹೋಗಿ ಕೇಳಿಕೊಂಡು ಬಂದಿದ್ದಾಳೆ ಏನೇನು ಬೇಕು ಎಂದು. ಅವನು ಕನ್ನಡದಲ್ಲಿ ಹೇಳಿದ್ದಾನೆ ಇವಳಿಗೆ ತಲೆ ಬುಡ ಅರ್ಥ ಆಗದೆ ಹಾಗೆ ವಾಪಸ್ ಬಂದಿದ್ದಾಳೆ.ಇವಳ ಹತ್ತಿರ ಬಂದು ನಿನಗೆ ಕನ್ನಡ ಗೊತ್ತಲ್ವ ನನಗೆ ಬಸ್ ಪಾಸು ಮಾಡಿಸ್ಕೊಡು.ಇ ಆಟೋ ದವರ ಹತ್ತಿರನು ಹೀಗೆ ಕಷ್ಟ ಆಗುತ್ತೆ ಏನು ಮಾತಾಡುತ್ತಾರೋ ಒಂದು ತಿಳಿಯಲ್ಲ ಬೇಗ ಕನ್ನಡ ಕಲಿಬೇಕು ಅಂತಿದ್ಲಂತೆ.ನನಗೂ ಹಾಗೆ ಹಿಂದಿ ಮಾತಾಡಿದ್ರೆ ಅರ್ಥ ಆಗಲ್ಲ.ಗೊಲ್ಗಪ್ಪ ತಿನ್ಬೇಕು ಅಂದ್ರೆ ತುಂಬಾ ಕಷ್ಟ :P)) ನಾನು  ಈಗ ರೆಡಿ ಆಗಿ ಬರೋದ್ರೊಳಗೆ ೨೦ ನಿಮಿಷ ಆಗೋಗತ್ತೆ ನೀವ್  ಇಬ್ರೆ ಹೋಗಿ ಬನ್ನಿ ಅಂದೆ .ಏನು ಪರವಾಗಿಲ್ಲ ನನಗೆ  ಶಾಪಿಂಗ್ ಕೂಡ ಇದೆ ನೀನು ಬಾ ಕಾಯ್ತಿವಿ. ಬೇಗ ಬಾ ಸ್ಟಾಪ್ ಗೆ ಅಂದ್ಲು. ಸರಿ ಎಂದು ಯಾವುದೊ ಪ್ಯಾಂಟ್ ಶರ್ಟ್ ಹಾಕಿ ಮುಖ ತೊಳೆದು ಹೊರಟೆ. 
ದಿನ ಒಂದರ ಹಿಂದೆ ಒಂದು ಬರುವ ಬಸ್ ಇವತ್ತು ಒಂದು ಇಲ್ಲ .ಯಾವಾಗ್ಲೂ ನಾವು ಹೊರಟಾಗ ನಾವು ಹೋಗುವಲ್ಲಿಗೆ ಬಸ್ ಬರಲ್ಲ ಬಿಡಿ. ಆಟೋ ದಲ್ಲಿ ಹೊರಟ್ವಿ. ಪಾಸು ಮಾಡಿಸುವಲ್ಲಿ ೩ ಜನ ಇದ್ರು ಅಷ್ಟೆ .ಕ್ಯು ಇರ್ಲಿಲ್ಲ. ಒಬ್ನು ಬಂದು ಇ ನಾರ್ಥಿ ಹತ್ತಿರ ಇಂಗ್ಲಿಷ್ ನಲ್ಲಿ ಬೆಳಗ್ಗೆ ನಾನು ೭೭೫ ಪಾಸ್ ತಗೊಂಡ್ ಹೋಗ್ಬಿಟಿದೀನಿ.ನನಗೆ 550 ದು ಬೇಕಾಗಿತ್ತು .ನಿಮಗೆ ಹೇಗಿದ್ರು ೭೭೫ ದು ಬೇಕಲ್ವ ಇಬ್ರು ಬದಲಾಯಿಸಿಕೊಳ್ಳೋಣ ಅಂದ. ಅವಳಿಗೆ ಅವನು ಏನು ಹೇಳ್ತಿದಾನೆ ಅಂತ ಸರಿಯಾಗಿ  ಅರ್ಥ  ಆಗ್ಲಿಲ್ಲ ಕಷ್ಟ ಪಟ್ಟು ಫುಲ್ ತಿಳಿಸಿದ್ದಾಯ್ತು . ಅವನೇ ಪಾಸ್  ನು ತಂದ್ಕೊಟ್ಟ 550 ಇಸ್ಕೊಂಡು. ಆಮೇಲೆ ಬಂದು ಮೇಡಂ ೨೨೫ ಈಗ ನೀವು ನಂಗೆ ಕೊಡ್ಬೇಕು ಅಂದ.ಇವಳ ಹತ್ತಿರ ಚೇಂಜ್ ಇರ್ಲಿಲ್ಲ ೩೦೦ ಅವನಿಗೆ ಕೊಟ್ಟು ಚೇಂಜ್ ಕೊಡಿ ಅಂದ್ಲು.ಅವ್ನು ನನ್ನ ಹತ್ತಿರವೂ ಚೇಂಜ್ ಇಲ್ಲ ಇರಿ ಯಾರ ಹತ್ತಿರವಾದರು ಇಸ್ಕೊಡ್ತೀನಿ ಅಂತ ಅಲ್ಲೇ ೩ ಜನರನ್ನ ಕೇಳಿದ ಹಾಗೆ ಮಾಡಿದ ಅವ್ರ ಹತ್ತಿರ ಇರ್ಲಿಲ್ಲ ಅಂತ ಪಕ್ಕದ ಆಫೀಸ್ ಲಿ ತಗೋ ಬರ್ತೀನಿ ಅಂತ ಹೇಳಿ ಹೊರಟ.ಇವಳಿಗೆ ಏನು ಎನಿಸಿತೋ ಗೊತ್ತಿಲ್ಲ ಇರಿ ೫೦ ಇದೆ ನಂ ಹತ್ರ ೧೦೦ ವಾಪಾಸ್ ಕೊಡಿ ಅಂತ ತಗೊಂಡ್ಲು..ಇನ್ನು ೨೫ ಚೇಂಜ್ ತಗೋ ಬನ್ನಿ ಅಂತ ಅವನ್ನ ಕಳಿಸಿ ಆಯಿತು..ಫುಲ್ ಪೆದ್ದರಾಗಿದ್ದು ಅಲ್ಲೇ..೩ ಜನರಲ್ಲಿ ಒಬ್ಬರಾದರು ಅವನ ಜೊತೆ ಹೋಗಬೇಕಿತ್ತು..ಆ ಅಸಾಮಿ ಹೊದೊವ್ನು ವಾಪಾಸ್ ಬಂದೆ ಇಲ್ಲ ನಾವು ಅರ್ಧ ಗಂಟೆ ಅಲ್ಲೇ ಕಾದಿದ್ದಾಯ್ತು.ಅವಳಂತೂ ಬೈತಾ ಇದಾಳೆ ಇ banglore  ಲಿ ಯಾರನ್ನು  ನಂಬಲು ಆಗೋಲ್ಲ ಸುಮ್ನೆ ನಾವು ಡೈರೆಕ್ಟ್ ಆಗಿ ಅಲ್ಲೇ ಪಾಸು ತಗೊಬೋದಿತ್ತು ಏನೋ ಭಾರಿ ಗೊತ್ತಿದ್ದವಳ ಹಾಗೆ ಹೇಳಿದೆ ಈಗ ನೋಡು ಅವನು ಬರೋದಿಲ್ಲ ಎಷ್ಟು ಕಾದರು ಅಷ್ಟೆ  .ನಡಿ ಹೋಗೋಣ. ನನಗೆ ಇವತ್ತು ಫುಲ್ ಲಾಸ್ ಅವನು ಏನೋ ಇಂಗ್ಲಿಷ್ ಲಿ ಹೇಳ್ತಿದ್ದ ನೀನು ಮತ್ತೆ  ಕನ್ನಡ ದಲ್ಲಿ ಮಾತನಾಡಿ ನನಗೆ ಏನು ಗೊತ್ತಾಗ್ದೆ ಇರೋ ತಾರಾ ಮಾಡ್ದೆ ಅಂತ ಹೇಳಿದ್ಲು.
ಅವಳನ್ನ ಅವಳ ಏರಿಯ ಬಸ್ ಹತ್ತಿಸಿ ವಾಪಾಸ್ ಬಂದ್ವಿ ನಾವಿಬ್ರು.ನನ್ನ ಫ್ರೆಂಡ್ ಹೇಳಿದ್ಲು ಅವಳು ಸಿಕ್ಕಾಪಟ್ಟೆ ಕರ್ಚು ಮಾಡೋಕೆ ಹಿಂದೆ ಮುಂದೆ ನೋಡ್ತಾಳೆ .ಇನ್ನು ಇದನ್ನೇ ೧ ವೀಕ್ ಹೇಳ್ತಾ ಇರ್ತಾಳೆ ಕನ್ನಡದವರಿಗೆ ಬೈತಾ ಇರ್ತಾಳೆ. ಅವ್ನು ಬಂದು ಕೊಟ್ಟಿದ್ರೆ ಚನಾಗಿತ್ತು ಅಂದ್ಲು . ಅದಕ್ಕೆ ಅಂದೆ ನೀನು ಎಷ್ಟು ಹುಡುಕಿದರು ಅವನು ಬರಲ್ಲ  ಒಂದು ಕೆಲಸ ಮಾಡು ಅವಳಿಗೆ ಈಗಲೇ ಫೋನ್ ಮಾಡಿ ಹೇಳು ನಾವು ನಿನ್ನ ಬಿಟ್ಟು ವಾಪಾಸ್ ಪಾಸ್ ಮಾಡಿಸಿದ ಜಾಗದಿಂದನೆ ಬಂದ್ವಿ .ಅವನು ಅಲ್ಲೇ ಕಾಯ್ತಾ ಇದ್ದ .೨೫ ವಾಪಾಸ್ ಕೊಟ್ಟಿದಾನೆ ಅಂತ ಹೇಳು . ಹೇಗಿದ್ರು ನಿನ್ನ ಫ್ರೆಂಡ್ ಅಲ್ವ ಇಷ್ಟು ಸುಳ್ಳು, ಕರ್ಚು ಮಾಡಿದ್ರೆ ಏನು ಆಗಲ್ಲ ಅಂದೆ..ಅವಳಿಗೂ ಸರಿ ಅನಿಸಿತ್ತು ಎನಿಸುತ್ತೆ ..ತಕ್ಷಣ ಫೋನ್ ಮಾಡಿ ಹೇಳಿದ್ಲು..ಫೋನ್ ಇಟ್ಟ ಸ್ವಲ್ಪ ಹೊತ್ತಿನಲ್ಲೇ ಅವಳ ಫೋನ್ ಬಂತು ಪಾಸ್ ಎಸ್ಟ್ ದಿನ ವ್ಯಾಲಿಡಿಟಿ,ಎಲ್ಲೆಲ್ಲಿಗೆ ಬರತ್ತೆ ಎಲ್ಲ ವಿಚಾರಸಿ ಬಾ.ಇವಳು ಫೋನ್ ಇಟ್ಟು ಹೇಳಿದ್ಲು  ಅಬ್ಬ ಸದ್ಯ ಅವಳ ಮಾತಿನಲ್ಲಿ ಈಗ ಸಮಾಧಾನ ಕಾಣ್ತಾ ಇದೆ ಅಂತ. ಸ್ಮೈಲ್ ಮಾಡಿ ಸುಮ್ಮನಾದೆ ..
ಮೂಡ ನಂಬಿಕೆಯನ್ನು ನಂಬದಿದ್ದರೂ ಮನಸಿನ ಒಂದು ಮೂಲೆಯಲ್ಲಿ ಅನಿಸುತ್ತಿತ್ತು ೩ ಜನ ಹೋಗಿದ್ದಕ್ಕೆ ಹೀಗಾಯ್ತ ಅಂತ.!

Monday, February 20, 2012

ದಸರಾ ಆನೆ

ದಸರಾಕ್ಕೆ ಕಾಡಿಗೆ ಬಂದ ಆನೆಗಳು ವಾಪಾಸ್ ತಮ್ಮ ನಾಡಿಗೆ ಹೋಗಲು ತಯಾರಿ ನಡೆಸುತ್ತಿರುವ ದೃಶ್ಯ ..ಇದರ ಮಧ್ಯೆ ಯಾವ ಆನೆ ಯಾವುದೆಂದು ಕಂಡುಹಿಡಿಯುವ ಸಾಹಸದಲ್ಲಿ ...


http://www.youtube.com/watch?feature=player_detailpage&v=-kG2IgICAH0

Monday, February 13, 2012

ಆ ಹುಡುಗ!!

ಅವಳಾಗ ಬಿ ಎಸ್ ಸಿ ೧ ನೇ ವರ್ಷ. ಕಾಲೇಜ್ ಗೆ ಅಪ್ಪನೇ ಬೆಳಗ್ಗೆ ಕಾರ್ ಅಲ್ಲಿ ಬಿಡಬೇಕಿತ್ತು .(ಕಾರಣ ಅಪ್ಪ ಅಮ್ಮನ ಮೇಲೆ ಕೋಪ.ಕೋಪ ಕ್ಕೆ ಕಾರಣ ಬೇರೇನೋ ಆದರು ತೋರಿಸಿಕೊಳ್ಳೋದು ಇವರ ಮೇಲೆ )ಸಂಜೆ ಬಸ್ ಗೆ ವಾಪಸ್ ಬರೋದು ರೂಢಿ.
ಒಂದು ದಿನ ಅಪ್ಪನಿಗೆ ಬೇರೆಲ್ಲೋ ಹೋಗಬೇಕಿದ್ದ ಕಾರಣ ಬಸ್ ಗೆ ಹೋಗೋ ಹಾಗಾಗಿತ್ತವಳಿಗೆ.. ಕಾಲೇಜ್ ಗೆ ಹತ್ತಿರ ಹೋಗೋ ಬಸ್ ಕಮ್ಮಿ ಇದ್ದಿದ್ರಿಂದ ಅದಕ್ಕೆ ಕಾದರೆ ಕಾಲೇಜ್ ಗೆ ಹೋಗೋಕೆ ಲೇಟ್ ಆಗುತ್ತೇನೋ ಎಂದು ಮತ್ತೊಂದು ಬಸ್ ಹತ್ತಿದ್ದಳು..ಇದು ನಿಲ್ಲಿಸುವ ಜಾಗದಿಂದ ೧ ಕಿ. ಮಿ. ನಡೆಯಬೇಕಿತ್ತು ಕಾಲೇಜ್ ಗೆ.
ಅವಳು ಇಳಿಯುವುದಕ್ಕೆ ಮುಂಚೆ ಇಳಿದ ಆ ಹುಡುಗ ಸ್ವಲ್ಪ ಜೋರಾಗೆ ಅವಳು ಹೋಗೋ ದಾರಿಯಲ್ಲೇ ಹೋಗುತ್ತಿದ್ದ.. ಅವಳು ಸುಮ್ಮನೆ ಅವನ ಹೆಜ್ಜೆಯನ್ನೇ ಗಮನಿಸುತ್ತ ನಿಧಾನವಾಗಿ  ಸಾಗುತ್ತಿದ್ದಳು. ಇನ್ನು ಅರ್ದ ದಾರಿ ಕ್ರಮಿಸಿರಲಿಲ್ಲ ಅವನ ಹೆಜ್ಜೆಗಳ ನಡಿಗೆ ಸ್ವಲ್ಪ ನಿಧಾನವಾಗಿತ್ತು..ಅವಳು ಇನ್ನು ನಿಧಾನಕ್ಕೆ ನಡೆಯಲು ಶುರು ಮಾಡಿದ್ಲು...ಎಷ್ಟೋತ್ತು ಅಂತ ಇಷ್ಟು ನಿಧಾನ ನಡೆಯೋದು...ಅವನನ್ನು ಧಾಟಿ ಮುಂದೆ ಹೋಗಿಬಿಡೋಣ ಎನಿಸಿ ಸ್ವಲ್ಪ ಜೋರಾಗಿ ನಡೆಯೋಕೆ ಶುರು ಮಾಡಿದ್ಲು..ಇನ್ನೇನು ಅವನ ಹತ್ತಿರ ಬಂದಳು ಅನ್ನೋವಾಗ
ಅವನು  ತಿರುಗಿ  ನಿಮ್ಮ ಹೆಸರೇನು ಕೇಳಿದ್ದ. 
ಅಪರಿಚಿತರೊಂದಿಗೆ ನಮ್ಮ ಬಗ್ಗೆ   ಹೇಳಿಕೊಳ್ಳಬಾರದೆಂದು  ಗೊತ್ತಿದ್ದರು ತಿರುಗಿ ಅವಳ ಹೆಸರು ಹೇಳಿದ್ದಳು ಆ ಹುಡುಗಿ...
ನಿಮ್ಮನ್ನು ತುಂಬಾ ಸಲ ನೋಡಿದ್ದೇನೆ ಸಂಜೆ ಹೊತ್ತಿನಲ್ಲಿ..
ಒಹ್! ಹೌದಾ! ಯಾವಾಗ? ಎಲ್ಲಿ? ನಾನೆಲ್ಲೂ ನಿಮ್ಮನ್ನ ನೋಡಿದ ನೆನಪಿಲ್ಲ..
ಅದೇ ಯಾವುದೋ ಹುಡುಗಿ,ಹುಡುಗನ ಜೊತೆ ಮಾತನಾಡುತ್ತಿರುತ್ತೀರಲ್ಲ  ಆ ಮನೆ ಎದುರು ಅಲ್ಲಿ
ಹನ್ ಕಂಪ್ಯೂಟರ್ ಕ್ಲಾಸ್ ಗೆ ಹೋಗ್ತಿದ್ದೀನಿ ಅದು ಮುಗಿದಾದ ಮೇಲೆ ಸ್ವಲ್ಪ ಮಾತಾಡಿ ಬರೋದು ಫ್ರೆಂಡ್ಸ್ ಜೊತೆ
ನೀವೇನ್ ಮಾಡುತ್ತಿರೋದು
ಡಿಪ್ಲೋಮಾ ,ಜೆ ಎಸ್ ಎಸ್ ಕಾಲೇಜ್ ನಲ್ಲಿ, ೧ ಸ್ಟ್ ಇಯರ್ 
ಕಾಲೇಜ್ ಟೈಮಿ೦ಗ್ಸ್  ಏನು ?
ಬೆಳಗ್ಗೆ ೯ ಟು ೫:೩೦ ಲ್ಯಾಬ್ ಇದ್ದಾಗ ..ಇಲ್ಲ ಎಂದರೆ ೧:೩೦   
ಅವಳ್ಯಾಕೆ ಅಷ್ಟೊಂದು ಹೇಳಿಕೊಳ್ಳುತ್ತಿದ್ದಾಳೆ ಅವಳಿಗೆ ತಿಳಿಯುತ್ತಿಲ್ಲ. ಆದರು ೧ ಕಿ. ಮೀ. ಒಬ್ಬಳೇ ಹೋಗೋದು ತಪ್ಪಿತ್ತು ಎಂಬ ಕುಶಿ ಇರಬಹುದು ಅಥವಾ ತನಗಿಂತ ಚಿಕ್ಕವನೆಂದೋ
ಇನ್ನೇನು ಕಾಲೇಜ್ ಬಂತು ಎನ್ನುವಷ್ಟರಲ್ಲಿ
 ಯಾವ್ ಕಾಲೇಜ್ ಅಂತ ಕೇಳಿದ್ದ ಅವನು
ಇದೇ ಅಂತ ಹೇಳಿ ರೋಡ್ ಕ್ರಾಸ್ ಮಾಡೋವಾಗ ಗಾಡಿ ಬಂದಿದ್ದರಿಂದ ಸ್ವಲ್ಪ ಸರಿದು ಅಲ್ಲೇ ನಿಂತಳು
ಇದೇ  ಸಮಯ ಅಂದ್ಕೊಂಡ ಅವನು ಸಂಜೆ ಎಷ್ಟೋತ್ತಿಗೆ ಸಿಗ್ತಿಯ  ಎಂದಿದ್ದ 
ಆ ! ನಾನ್ಯಾಕೆ ನಿಂಗೆ  ಸಿಗಬೇಕು?
ನಾನು ನಿನ್ನ ಲವ್ ಮಾಡ್ತಿದೀನಿ..
ತಲೆ ಗಿಲೆ ಸರಿ ಇದ್ಯ ನಿಂಗೆ ಲವ್ ಅಂತೆ ಹೇಳಿ, ಅವನು ಹೆಸರು ಹಿಡಿದು ಕರೆಯೋದು ಕೇಳಿದರು ಬೇಗ ಬೇಗನೆ ಕಾಲೇಜ್ ಕಾಂಪೌಂಡ್ ಅಲ್ಲಿ ಮರೆಯಾಗಿದ್ಲು ..ಕ್ಲಾಸ್ ಅಲ್ಲಿ ಪಾಠ ಕೇಳಲು  ಆಗುತ್ತಿಲ್ಲ. ಕೈ  ಕಾಲೆಲ್ಲ  ನಡುಗುತ್ತಿದೆ ಹೇಳಿಕೊಳ್ಳಲು  ಯಾರೊಬ್ಬರು ಫ್ರೆಂಡ್ಸ್ ಇಲ್ಲ ಆ ಡಬ್ಬ ಕಾಲೇಜ್ ಅಲ್ಲಿ ..ಮಧ್ಯಾಹ್ನವೆ ಕ್ಲಾಸ್ ಮುಗಿದಿತ್ತವತ್ತು..ಬೇಗ ಬೇಗನೆ ಬಸ್ ಹತ್ತಿ ಮನೆಗೆ ಹೋಗಿದ್ದಳು ..ಮನೆಗೆ ಹೊದೊಳೆ ಬೆಳಗ್ಗಿಂದ ಸಂಜೆ ವರೆಗೆ ನಡೆದಿದ್ದು ಎಲ್ಲದನ್ನು ಹೇಳೋಳಿಗೆ ಇವತ್ತು ನಡೆದಿದ್ದನ್ನು ಹೇಳುವ ಆತುರ ...
ಅಮ್ಮ ಇವತ್ತು ಅಬ್ಬವ್ನು ನಾನು ಹೋಗೋ  ಬಸ್ ಗೆ ಬಂದು ಮಾತಾಡ್ಸಿ ನಾನಿನ್ನ ಲವ್ ಮಾಡ್ತಿದೀನಿ ಅಂದ ...
ಹೌದ ನಿನ್ ಯಾಕೆ ಮತಾಡೋಕೆ ಹೋದೆ. ನೋಡು ಇನ್ನೊಂದಿನ ಹೀಗೆ ಏನಾದ್ರೂ ಮತ್ತೆ ಕಾಟ ಕೊಟ್ರೆ ಏನಾದ್ರು ಮಾಡೋಣ
ಅಮ್ಮ ನನ್ಕಿಂತ ಚಿಕ್ಕೋನು ಅವ್ನು ಬಿಡು ಏನಾಗಲ್ಲ .
ಮರ್ದಿನ ಮತ್ತೆ ಅಪ್ಪ ಬೆಳಗ್ಗೆ ಕಾಲೇಜ್ ಗೆ ಬಿಟ್ಟಿದ್ದಾಯ್ತು ... ಸಂಜೆ ಬಸ್ಸಿಳ್ದು ೧೦ನಿಮಿಷ ನಡೆಯಬೇಕು ಅವಳ ಮನೆಗೆ..ನಡೆದು ಬರುತ್ತಿದ್ದಾಳೆ ಹಿಂದಿನಿಂದ ಇವಳ ಹೆಸರನ್ನೇ ಕೂಗುತ್ತ ಹಿಂದಿನಿಂದ ಯಾರೋ ಬಂದಂತಾಗಿ ಹಿಂದೆ ತಿರುಗಿ ನೋಡಿದ್ರೆ ಮತ್ತೆ ಅದೇ ಮಹಾಶಯ ..
ನಾನು ನಿನ್ನನ್ನ ತುಂಬಾ ಇಷ್ಟ ಪಡ್ತಿದೀನಿ ಪ್ಲೀಸ್ ಒಪ್ಕೋ...
ಯಾರನ್ನ ?ಏನು ?ಯಾರು ನೀನು ? ..ನಾನೇನು ೧ ಪಿ ಯು ಹುಡುಗಿ ಅಲ್ಲ (ಆ ಕಾಲೇಜ್ ಅಲ್ಲಿ ಪಿ ಯು ಇಂದ ಡಿಗ್ರಿ ವರೆಗೂ ಇತ್ತು .. ಅವನು ಅವಳಿನ್ನು ಪಿ ಯು ಎಂದುಕೊಂಡಿದ್ದು ಸ್ಪಷ್ಟವಾಗಿ ಗೊತ್ತಾಗುತ್ತಿತ್ತು ) ಬಿ ಎಸ್ ಸಿ ಓದ್ತಿರೋದು ಆ ಕಾಲೇಜ್ ಅಲ್ಲಿ...ಅವನ ಕಂಗಳು ಇಷ್ಟ ಗಲ ಆಗಿದ್ದು ಸ್ಪಷ್ಟ ವಾಗಿ ಕಾಣುತ್ತಿತ್ತು .. ಸುಮ್ಮನೆ ವಾಪಾಸ್  ಹೋಗಿದ್ದ ಏನು ಹೇಳಬೇಕೆಂದು ತಿಳಿಯದೆ  
ಅಬ್ಬ ಇನ್ನು ಬರುವುದಿಲ್ಲವೆಂದು ತಿಳಿದು  ಮನೆಗೆ ಹೋಗಿದ್ದಳವಳು
ಮನೆಯಲ್ಲಿ ಅಮ್ಮ ಇವತ್ತು ಏನಾಯ್ತು ..ಏನಿಲ್ಲ ಬಿಡು ...ಯಾಕೋ ಅಮ್ಮನು ಮಾತಾಡದೆ ಸುಮ್ಮನಾಗಿದ್ದಳು
ಮತ್ತೆ ಮರುದಿನ ಮನೆಗೆ ವಾಪಾಸ್ ಬರುವಾಗ ಓಡಿ ಬಂದಿದ್ದ
 ನಿಮ್ಮತ್ರ ಮಾತಾಡ್ಬೇಕು..
ಅವಳು ಏನು ಕೇಳದಂತೆ ಸುಮ್ಮನೆ ಹೋಗುತ್ತಿದ್ದಳು
ಪ್ಲೀಸ್ ೨ ನಿಮಿಷ ನಿಲ್ಲಿ 
ಏನು ??ನನಗೆ ನಿನ್ನ ಹತ್ತಿರ ಮಾತಾಡೋಕೆ ಇಷ್ಟ ಇಲ್ಲ
ಸ್ವಲ್ಪ ಸಣ್ಣಗೆ ಮಾತಾಡಿ ಪ್ಲೀಸ್  
ಅವಳ ದ್ವನಿ ಅಷ್ಟರಲ್ಲೇ ೪ ಮನೆಗೆ ಕೇಳುವಷ್ಟು ಜೋರಾಗಿತ್ತು ..ಆದರೆ ಪಕ್ಕದಲ್ಲಿ ಯಾವುದೇ ಮನೆ ಇಲ್ಲದೆ ಬಟಾ ಬಯಲಾಗಿದ್ರಿಂದ ಯಾರಿಗೂ ಕೇಳಿಸಿರಲಿಲ್ಲ 
ನಾನು ಡಿಪ್ಲೋಮಾ ಫಸ್ಟ್ ಇಯರ್ ಓದಿ  ಮುಗಿಸೋಕಾಗ್ದೆ  ೨ ವರ್ಷ ಕೆಲಸ ಮಾಡ್ತಿದ್ದೆ ಇವಾಗ ಮತ್ತೆ ಓದ್ತಾ ಇದ್ದೀನಿ ..
ಇದನ್ನ ನಿನ್ನೇನೆ ಹೇಳ್ಬೋದಿತ್ತಲ್ಲ .. ನಿನ್ನೆ ನಿನ್ನ ಫ್ರೆಂಡ್ಸ್ ಈ ವಿಷಯಾ ಹೇಳ್ಕೊಟ್ಟಿರಲಿಲ್ವ ಅತ್ವ ಗಟ್ಟಿ ಹಾಕಿದ್ದು ಮರ್ತೊಗಿತ್ತ...ಡಿಪ್ಲೋಮಾ ಸರಿಯಾಗಿ ಮುಗಿಸೋಕೆ ಬಂದಿಲ್ಲ ಈಗ ಲವ್ ಬೇರೆ . ನಿನ್ನ ಫ್ಯೂಚರ್ ಬಗ್ಗೆ ಯೋಚನೆಯೇ ಇಲ್ಲ ನಿನಗೆ..ಏನು ನನ್ನ ಲೈಫ್ ಅನ್ನು ಹಾಳು ಮಾಡಬೇಕು ಅಂದ್ಕೊಂಡಿದೀಯ ..ಇನ್ನು ಏನೇನೋ ಹೇಳುತ್ತಾ ಮುಂದೆ ಹೋದಳು
ಅವನು ಅವನ ದಾರಿಯಲ್ಲಿ ವಾಪಾಸ್ಸ್ ಹೋಗುತ್ತಿದ್ದ
ಮನೆಗೆ ಬಂದ ನಂತರ ಅಮ್ಮನದ್ದು ಮತ್ತೆ ಅದೇ ಪ್ರಶ್ನೆ ಇವತ್ತೇನಾಯ್ತು
ಏನಿಲ್ಲ ಬಿಡು ಅವನಿನ್ನೂ ಬರೋದಿಲ್ಲ ನನಗೆ ಗೊತ್ತಿಲ್ಲದಂತೆ ೪ ಮನೆಗೆ ಕೇಳೋಹಾಗೆ ಬೈದು ಕಳಿಸ್ದೆ ..
ಇದಾಗಿ ೫ ವರ್ಷ ಆಗಿದೆ ಮೊನ್ನೆ ಅದೇ ಹುಡುಗ ಆ ಗೂಡಂಗಡಿ ಯಲ್ಲಿ ಬೀಡಿ ಸೇದುತ್ತ ನಿಂತಿದ್ದನ್ನು ನೋಡಿ ಇವನನ್ನ ಲವ್ ಮಾಡಿದ್ರೆ ನಾನು ಅವನ ಪಕ್ಕ ನಿಂತು ಸಿಗರೇಟ್ ಸೇದ್ಬೇಕಿತ್ತು ಎಂದುಕೊಂಡು ನೋಡಿಯು ನೋಡದಂತೆ ಅವನಿಂದ ಮರೆಯಾದಳು ...